Магистратура

НИЗОМНОМА ДАР БОРАИ ШУЪБАИ МАГИСТРАТУРАИДОНИШГОҲИ ДАВЛАТИИ ДАНҒАРА

 

  1. МУҚАРРАРОТИ УМУМӢ
  1. Шуъбаи магистратура (минбаъд шуъба) ҷузъи сохтории Донишгоҳи давлатии Данғара  (минбаъд донишгоҳ) буда, фаъолияти батанзимдарорӣ ва ҳамоҳангсозии корҳоро вобаста ба татбиқи барномаҳои магистрӣ дар тамоми самтҳои тайёр кардани магистрантон, баланд бардоштани сифати таҳсилот дар магистратура, таъмини рақобатпазирии дохилӣ ва байналмилалии магистратураи донишгоҳ амалӣ месозад.
  2. Шуъба бо фармоиши ректор дар таркиби Департаменти илм ва татбиқоти донишгоҳ таъсис дода мешавад.
  3. Низомномаи мазкур фаъолияти шуъбаро ба танзим дароварда, вазифа, уҳдадорӣ, ҳуқуқ ва масъулиятҳои шуъба ва кормандони он, инчунин, ҳамкории шуъбаро бо сохторҳои дигари донишгоҳ муайян мекунад.
  4. Шуъба дар фаъолияти худ Оинномаи донишгоҳ, дигар санадҳои меъёрии ҳуқуқӣ, ҳамчунин, муқаррароти Низомномаи мазкурро ба роҳбарӣ мегирад.
  5. Сохтор, шумораи кормандон, тағйирот ба сохтор ва ҷадвали воҳидҳои кори шуъбаро ректори донишгоҳ тасдиқ мекунад.
  6. Шартҳои меҳнати кормандони шуъбаро қоидаҳои тартиботи дохилии донишгоҳ, шартномаҳои меҳнатии бо ҳар як корманд басташуда ва санадҳои дигари ҷорӣ муайян мекунанд.
  7. Уҳдадориҳои меҳнатии кормандони шуъба тибқи муқаррароти дастурамалҳои дар донишгоҳ тасдиқшуда муайян карда мешавад.
  8. Ба ҳуҷҷатҳои шуъба, ба ғайр аз кормандони шуъба, ректор, муовинони ӯ, сардорони шуъбаҳои илм ва таълим, деканони факултет, шахсони ба санҷиши фаъолияти шуъба салоҳиятдошта, инчунин, шахсони дигар мутобиқи қонунгузории Ҷумҳурии Тоҷикистон  ҳуқуқи дастрасӣ доранд.
  9. Низомнома дар бораи шуъба, тағйирот ва иловаҳое, ки ба он ворид карда мешаванд, аз ҷониби ректори донишгоҳ тасдиқ карда мешавад.

 

  1. ВАЗИФАҲОИ ШУЪБА
  1. Вазифаи асосии шуъбаи магистратура:

- роҳнамоии барномаҳои магистрӣ бо мақсади баланд бардоштани донишҳои касбии мутахассисон, такмили сифатҳои кори онҳо баҳри иҷрои вазифаҳои нави меҳнатӣ;

- ҳамоҳангсозии корҳои таълимӣ, ташкилӣ-методӣ ва илмӣ-тадқиқотии ҳайати профессорону омӯзгорон ҷиҳати таъмини ягонагии низоми талабот ба ташкил, шартҳои татбиқ ва баҳодиҳии сифати барномаҳои тайёр кардани магистрантон;

- банақшагирӣ ва ташкили раванди таълими магистрантон;

- ташкил ва баҳисобгирии ҳаракати ҳайати магистрантон.

2.2 Мутобиқи вазифаҳо шуъбаи магистратура корҳои зеринро анҷом медиҳад:

- дар донишгоҳ фаъолияти таълимии магистрантонро мутобиқ ба стандартҳои таълимии донишгоҳ, нақшаҳои таълимии самти магистратура, санадҳои меъёрии ҳуқуқии амалкунанда, ки Вазорати маориф ва илми Ҷумҳурии Тоҷикистон, раёсат ва шӯрои олимони донишгоҳ муқаррар кардааст, ташкил мекунад;

- ташкил ва баргузории машғулиятҳои таълимии магистрантон, қабули санҷиш ва имтиҳоноти онҳоро назорат мебарад;

  • донишгоҳ оид ба фаъолияти магистратура маълумотнома таҳия ва пешниҳод мекунад;

- саривақт ба мудирони кафедраҳо дар бораи қарорҳои мақомоти болоӣ оид ба масъалаҳои амалигардонии барномаҳои магистрӣ маълумот медиҳад;

- назоратро аз болои ташкил ва гузаронидани таҷрибаомӯзӣ ва малакаандӯзии магистрантон ба роҳ мемонад;

- корҳои ташкилӣ-методиро ҷиҳати барасмиятдарории ҳуҷҷатҳои ҷорӣ ва хатми магистрантон амалӣ месозад;

- якҷоя бо дигар сохторҳои донишгоҳ дар мураттабсозии ҳисоботҳои даврӣ ва якдафъина оид ба кори магистратура ҷиҳати ба мақомоти болоӣ, мақомоти омор ва дигар ташкилоту муассисаҳо ширкат меварзад;

- назоратро аз болои таъмини ҳифзи иҷтимоии магистрантон ба роҳ мемонад;

- дар кори иҷозатномагирӣ барои самтҳои нави тайёр кардани магистрантон иштирок менамояд;

- якҷоя бо кафедраҳо доир ба васеъ кардани феҳристи барномаҳои магистрӣ аз рӯи самтҳои иҷозатномадошта кор мебарад;

- тавассути сомонаи муассиса ба ҳайати проффесорӣ-омӯзгорӣ ёрии иттилоотӣ мерасонад;

- дар кори таблиғоти касбӣ оид ба ҷалби хатмкунандагон ба магистратура ширкат меварзад ва иттилооти таблиғотї таҳия месозад;

- дар ташкил ва баргузории конференсияҳои илмӣ-амалӣ, мизҳои мудаввар, семинарҳои илмӣ (эҷодӣ)-и магистрантон иштирок менамояд;

- ҳуҷҷатгузории шуъбаро пеш мебарад;

- интихоби хатмкунандагон ва натиҷаҳои қабул ба магистратураро арзёбӣ ва таҳлил мекунад;

- банақшагирии раванди таълимро дар асоси нақшаҳои таълимии дар донишгоҳ  таҳия ва тасдиқшуда амалӣ месозад, аз болои пешрафти магистрантон назорат мебарад;

- ведомостҳо, варақаҳои имтиҳонӣ ҷиҳати такроран супоридани санҷишу имтиҳонот, ҷадвали ҳимояи корҳои тахассусии хатм, инчунин, ҳуҷҷатҳои барои кори рӯзмарра заруриро омода месозад;

- дар ташаккули рейтинги магистрантон тибқи қоидаҳои дар донишгоҳ тасдиқшуда, аз он ҷумла, бо истифодаи низоми кредитии фанҳои нақшаҳои таълимӣ иштирок менамояд;

- ҳуҷҷатҳои намунаи давлатӣ  дар бораи таҳсилоти магистрантонро ба расмият медарорад;

- лоиҳаҳои локалии санадҳоро аз рӯи самтҳои фаъолияти худ омода месозад.

 

  1. МАҚОМ, ҲУҚУҚ ВА УҲДАДОРИҲО
  1. Шуъбаи магистратура ҷузъи сохтории мустақили донишгоҳ буда, ба муовини ректор оид ба корҳои илмӣ тобеъ мебошад.
  2. Шуъба ҳуқуқ дорад:
  • барои амалисозии вазифаҳои шуъба аз тамоми сохтор ва хадамот, сарфи назар аз тобеият, маълумоти заруриро дастрас намояд;
  • дар донишгоҳ аз болои иҷрои барномаҳои магистрӣ назорат барад;
  • дар машғулиятҳои таълимӣ, ҷаласаи кафедраҳо ва шӯрои олимони донишгоҳ ҳангоми баррасии масъалаҳои вобаста ба иҷрои барномаҳои тайёр кардани магистрантон иштирок намояд;
  • фармоишҳои ба фаъолияти магистратура дахлдорро, ки иҷрои онҳо барои факултетҳо ва кафедраҳо ҳатмист, интишор кунад;
  • якҷоя бо шуъбаи таълими донишгоҳ нақшаи нашри адабиёти таълимӣ ва таълимӣ-методӣ барои магистрантонро бо факултетҳо ва кафедраҳо мувофиқа кунад;
  • лоиҳаи санадҳои меъёрии донишгоҳро дар самти фаъолияти магистратура таҳия созад;
  • манфиатҳои донишгоҳро дар қисмати иҷрои вазифаҳои ба зиммаи шуъбаи магистратура гузошташуда дар ташкилотҳои дигар манзур кунад;
  • оид ба такмили фаъолияти шуъба ба роҳбарияти донишгоҳ пешниҳодҳо ироа кунад;
  • ҷиҳати таъмини фаъолияти мунтазаму босамари шуъба аз компютерҳо, таҷҳизоти нусхаафзо ва техникаву захираҳои дагари дар донишгоҳ мавҷуда васеъ истифода намояд.
    1. Кормандони шуъба уҳдадоранд:
  • такмил ва рушди фаъолияти шуъбаро мунтазам таъмин созанд;
  • вазифаҳои ба зиммаи шуъба вогузоршударо бо сифат ва пурра иҷро кунанд;
  • қарорҳои шӯрои олимон, амру фармоишҳо ва супоришҳои ректори донишгоҳро дар муҳлатҳои муқарраршуда амалӣ созанд.

 

  1. РОҲБАРИИ ШУЪБА
  1. Шуъбаро сардор, ки бо фармоиши ректори муассиса ба вазифа таъин ва озод карда мешавад, роҳбарӣ мекунад.
  2. Сардори шуъба бевосита ба тамоми фаъолияти шуъба роҳбарӣ мекунад ва ба ҷонишини ректор оид ба илм тобеъ аст;
  3. Сардори шуъба вазифаҳои зеринро амалӣ месозад:
  • ба фаъолияти шуъба роҳбарӣ мекунад, ташкили кори он, иҷрои вазифа ва масъулиятҳои онро, ки Низомномаи мазкур муайян кардааст, инчунин, иҷрои амру фармоиш ва супоришҳои роҳбарият, қарорҳои  донишгоҳро  таъмин месозад;
  • оид ба такмили фаъолияти шуъба, баланд бардоштани самаранокии кори он ба муовини ректор оид ба илм пешниҳодҳо манзур мекунад;
  • роҳбарии бевосита ва назорати фаъолияти шуъбаро амалӣ мекунад;
  • лоиҳаи санадҳои меъёриву методии марбут ба ташкили фаъолияти шуъбаро таҳия месозад;
  • якҷоя бо шуъбаи таълими донишгоҳ такмили ихтисоси кормандони шуъбаро ташкил мекунад;
  • бо мақсади такмили маҳорати касбӣ ҷиҳати фиристонидани кормандон ба семинарҳо ва чорабиниҳои дигари ба масъалаҳои фаъолияти магистратура дахлдор ташаббус нишон медиҳад;
  • ба риояи қоидаҳои тартиботи дохилӣ, ҳифзи меҳнат ва техникаи бехатарӣ аз ҷониби кормандон назорат мебарад.

Сардори шуъба ҳуқуқ дорад:

  • аз кормандони шуъба иҷрои пурра ва босифати уҳдадориҳои дар дастурамали вазифавӣ муайяншударо талаб намояд;
  • аз кормандони шуъба риояи муқаррароти оинномаи донишгоҳ, қоидаҳои тартиботи дохилӣ, ҳифзи меҳнат ва техникаи бехатарӣ , иҷрои амру фармоишҳои ректори донишгоҳ талаб кунад;
  • аз роҳбарони сохторҳои дигари донишгоҳ мавод ва иттилооти барои иҷрои вазифа ва пешбурди фаъолияти донишгоҳ заруриро дархост ва дарёфт кунад.

Сардори шуъба масъулияти шахсӣ дорад:

- барои иҷро накардани вазифа ва уҳдадориҳои ба уҳдаи шуъба дар низомномаи мазкур, амру фармоиш ва супоришҳои роҳбарият, қарорҳои шӯрои олимони муассиса вогузоршуда;

- барои самаранок набудани кори шуъба.

 

  1. Ҳамкорӣ бо дигар сохторҳои муассиса

5.1. Ҳамкории шуъба бо дигар сохторҳои донишгоҳ дар асоси вазифа ва корҳое, ки низомномаи мазкур ба уҳдаи шуъба вогузор кардааст, муайян карда мешавад.

5.2. Шуъба ҳамкорӣ мекунад:

- бо комиссияи қабули донишгоҳ оид ба масъалаҳои интихоби довталабон, қабули онҳо ва парвандаҳои шахсии онҳо;

- бо кафедраҳои пешбар, садорати факултетҳо ва сохторҳои дигари донишгоҳ аз рӯи масъалаҳои умумӣ ва масоили пешбурди барномаҳои магистрӣ;

- бо бахшҳои хизматрасонии пулакии таълим оид ба масъалаҳои бастани шартнома ҳангоми қабул, барқарорсозӣ, интиқол ва хориҷкунӣ;

- бо муҳосиботи донишгоҳ оид ба масъалаҳои ҳисобӣ кардани пардохти таҳсилоти магистрантон дар ҳолатҳои барқароршавӣ, интиқол ва хориҷшавӣ;

- бо шуъбањои илм ва таълим оид ба масъалаҳои ҳуҷҷатгузорӣ ва омодасозии ҳуҷҷатҳо, ташкил ва банақшагирии раванди таълим, истифодаи фонди аудиторӣ, ҷадвали дарсҳо;

- бо шуъбаи кадрҳои донишгоҳ дар хусуси баҳисобгирии ҳайати магистрантон ва кормандони шуъба;

- бо китобхонаи донишгоҳ оид ба масъалаҳои хизматрасонии фавриву китобхонавӣ ва иттилоотӣ-библиографии магистрантон;

- бо кумитаи иттифоқи касабаи муассиса оид ба масоили хусусияти иҷтимоӣ-маишӣ, инчунин, бо сохторҳои дигар ҷиҳати иҷрои вазифа ва уҳдадориҳои ба зиммаи шуъба вогузоршуда;

- бо шуъбаи табъу нашр ва полиграфияи донишгоҳ вобаста ба масъалаҳои чопи ҳуҷҷатҳо ва адабиёти методӣ.

 

  1. Таҷдид ва барҳамдиҳӣ

6.1 Шуъбаи магистратура дар асоси қарори шӯрои олимон бо фармоиши ректори донишгоҳ таҷдид ва ё барҳам дода мешавад.