Сохтори кафедраи ҳарбӣ

 

Файзуллозода Ифтихор Файзулло

Мудири кафедраи ҳарбӣ
Майор
Телефон: +992 93 880 88 74

 

 

Кафедраи ҳарбии Донишгоҳи давлатии Данғара аз ҷумлаи дастовардҳои даврони соҳибистиқлолии кишвар ба ҳисоб рафта, ҷавонтарин кафедраҳои муассисаҳои таҳсилоти олии касбии кишвар ба ҳисоб меравад

Кафедра бо Қарори Ҳукумати Ҷумҳурии Тоҷикистон аз 2-юми майи соли 2014, таҳти №261 ва фармони вазири мудофиаи Ҷумҳурии Тоҷикистон аз 14 майи соли 2014, №329 дар заминаи филиали кафедраи ҳарбии Донишгоҳи аграрии Тоҷикистон ба номи Шириншоҳ Шоҳтемур таъсис ёфтааст. Кафедра фаъолияти худро дар асоси Қонуни Ҷумҳурии Тоҷикистон «Дар бораи уҳдадории умумиҳарбӣ ва хизмати ҳарбӣ», Қарори Ҳукумати Ҷумҳурии Тоҷикистон аз 30-юми майи соли 2014, таҳти №344 «Дар бораи Низомномаи ташкил ва ба роҳмондани таълим дар кафедраҳои ҳарбии муассисаҳои таҳсилоти олии касбӣ», фармонҳои Вазири мудофиаи Ҷумҳурии Тоҷикистон, фармоишҳои Вазири маориф ва илми Ҷумҳурии Тоҷикистон, Оинномаҳои Қувваҳои Мусаллаҳи Ҷумҳурии Тоҷикистон ва дигар санадҳои меъёрию ҳукуқӣ ба роҳ мондааст.

Кафедраи ҳарбӣ аз рӯи ихтисоси командири взводи савораи тирандоз дар мошинҳои зиреҳпуши ҷангӣ (МҶП-БМП) афсарони эҳтиётро тайёр менамояд. Ба ҳолати имрӯз кафедраи ҳарбӣ афсарони эҳтиётии болаёқатро барои Қувваҳои Мусаллаҳи Ҷумҳурии Тоҷикистон омода намуда истодааст, ки қисми зиёди онҳо дар ҳифзу ҳимояи ватани азизу маҳбубамон қарор доранд. Айни замон дар кафедра ҳамагӣ аз ҳамаи факултетҳои донишгоҳ 2246 нафар донишҷӯён ба таҳсил фаро гирифта шудаанд. Дар кафедраи ҳарбӣ айни ҳол 11 нафар афсар дар тайёр намудани афсарони эҳтиётӣ саҳмгузор мебошанд.

 

 

Ҳамаи афсарони кафедраи ҳарбӣ дорои маълумоти олӣ ва ҳарбӣ мебошанд. Онҳо таҷрибаи бойи омӯзгорӣ дошта, машғулиятҳоро бо донишҷӯён бо истифода аз технологияи муосир ба роҳ мондаанд. Афсарону омӯзгорон ва донишҷӯён кафедраи ҳарбӣ дар тамоми чорабиниҳои сиёсию фарҳангӣ иштироки фаъолона намуда, аз тарафи масъулин бо ифтихорномаҳо сарфароз гардонида мешаванд. Машғулиятҳо дар кафедраи ҳарбӣ ба таври “Рӯзи ҳарбӣ” ба роҳ монда шудааст. Донишҷӯён дар як ҳафта як рӯз ба дарсҳои ҳарбӣ ҷалб карда мешаванд. Ҷиҳати аз худ намудани барномаи тайёрии ҳарбӣ дар маҷмӯъ 5 семестр 450 соат (ҳар семестр 90-соатӣ) ва 144 соат ҷамъомадҳои таълимии саҳроӣ машғулиятҳои ҳатмии аудиторӣ ва алоҳида муқаррар карда шудааст. Миқдори машғулиятҳои ҳатмии аудиторӣ ва алоҳида бо роҳбарии омӯзгор 6 соат дар як рӯз ва 2 соат худомӯзи донишҷӯён муқарар гардидааст.

 

 

Дар кафедра барномаҳои таълимӣ ва нақшаҳои дарсӣ, бо назардошти омода намудани афсарони эҳтиётии баландихтисос, ҷавобгӯ ба талаботи замони муосир, бо назардошти вазъияти душвори ҳарбӣ, омӯзиши хатарҳои ҷангӣ, инчунин тарбия намудани ҷавонон дар рӯҳияи баланди ватандӯстӣ, ҳифзи марзубуми кишвари азиз, мубориза алайҳи зуҳуроти бегонапарастӣ, шомил нашудан ба ҳизбу ҳаракатҳои экстремистӣ, баланд бардоштани малакаю донишҳои ҳарбӣ таҳия шудаанд. Ҳангоми гузаронидани машғулиятҳо ҳама намуди ҷангҳои муосири ҷаҳон ва хислату амали гурӯҳҳои терористӣ ба донишҷӯён омӯзонида мешаванд. Ба донишҷӯёне, ки барномаи тайёрии ҳарбиро пурра гузашта, имтиҳонҳои давлатиро месупоранд, бо тартиби муқаррарнамудаи Вазорати мудофиаи Ҷумҳурии Тоҷикистон бо рутбаи аввалини афсарии лейтенанти хурди эҳтиёт сарфароз гардонида шуда, ба сафи афсарони эҳтиёти Қувваҳои Мусаллаҳи Ҷумҳурии Тоҷикистон шомил карда шуда, парвандаҳои шахсии онҳо барои ба қайд гирифтан ба комиссариатҳои ҳарбии маҳалли зист фиристода мешаванд.